बीपी, अरनिको र कर्णालीसहित मुख्य राजमार्ग अवरुद्ध : कुन सडकको अवस्था के छ ?

काठमाडौँ – लगातारको वर्षा, बाढी तथा पहिरोका कारण बागमती र कर्णाली प्रदेशका प्रमुख राजमार्गमा सवारी आवागमन प्रभावित भएको छ। प्रहरी प्रधान कार्यालयले शनिबार बिहान जारी गरेको अद्यावधिक विवरण अनुसार विभिन्न स्थानमा सडक पूर्ण रूपमा अवरुद्ध हुनुका साथै केही खण्डमा एकतर्फी मात्र गाडी सञ्चालन भइरहेका छन्।

धादिङको बेनीघाट रोराङ गाउँपालिका-७ कृष्णभिरमा पहिरो जाँदा पृथ्वी राजमार्ग पूर्ण रूपमा अवरुद्ध छ। सोही राजमार्गकै बेनीघाट रोराङ-१० जवाङखोला र शितलबजार क्षेत्रमा भने पहिरो पन्छाएर एकतर्फी यातायात सञ्चालनमा ल्याइएको छ। चितवनको बेनीघाट रोराङ-१० जवाङखोला खण्डमा सडक मर्मतपछि एकतर्फी गाडी चलिरहेका छन्।