पर्यटन क्षेत्रमा ५२ अर्बको क्षति, होटलमा मात्र साढे १९ अर्बको नोक्सानी

तिब्बती क्षेत्रबाट भोटेकोसी हुँदै त्रिशूली नदीमा आएको हिमबाढीले रसुवा, नुवाकोट, धादिङ र गोरखाको पर्यटन क्षेत्रमा मात्र ५२ अर्ब १३ करोड रुपैयाँ बराबरको क्षति पुर्‍याएको छ। संस्कृति, पर्यटन तथा नागरिक उड्डयन मन्त्रालयद्वारा गठित ‘भोटेकोसी हिमबाढी क्षति मूल्यांकन समिति’ले तयार पारेको प्रारम्भिक अध्ययन प्रतिवेदनमा हिमचट्टानसहितको पहिरो हिमतालमा खसेर अति वेगमा आएको विनाशकारी बाढीबाट पर्यटन क्षेत्रमा मात्र कुल ५२ अर्ब १३ करोड ६५ लाख ७६ हजार ५०० रुपैयाँ बराबरको क्षति भएको उल्लेख छ। अध्ययन समितिमा नेपाल पर्यटन बोर्डका सञ्चालक समिति सदस्य सहदेव धमलाको संयोजकत्वमा निजी क्षेत्रका प्रतिनिधिहरूसमेत आबद्ध रहेर काम गरिरहेका छन्।

प्रतिवेदनमा भोटेकोसी र त्रिशूली नदी तटीय क्षेत्रमा रहेका होटलमा मात्र १९ अर्ब ५६ करोड रुपैयाँको क्षति पुगेको उल्लेख छ। होटल व्यवसायी महासंघले उपलब्ध गराएको तथ्यांकअनुसार बाढीका कारण २०७ वटा होटल तथा रेस्टुरेन्ट क्षतिग्रस्त बनेका छन्।