इजरायलले २३ सय नेपाली कामदार लैजाने, कस्ता छन् योग्यता र मापदण्ड ?

नेपालबाट इजरायलमा २ हजार ३ सय नेपाली कामदार लैजाने प्रक्रिया सुरु भएको छ । नेपाल सरकार र इजरायल सरकारबीच भएको द्विपक्षीय श्रम सम्झौताअनुसार इजरायलका दीर्घकालीन स्याहार केन्द्रहरूमा सहायक कामदारका रूपमा नेपाली नागरिकलाई रोजगारीका लागि पठाउन वैदेशिक रोजगार विभागले आवेदन खुला गरेको हो ।

विभागका अनुसार कुल मागमध्ये ४० प्रतिशत कोटा पुरुष र ६० प्रतिशत महिला कामदारका लागि छुट्याइएको छ । इच्छुक तथा योग्य नेपाली नागरिकले विभागको अनलाइन वेब पोर्टलमार्फत आवेदन दिन सक्नेछन् । आवेदन प्रक्रिया २०८३ जेठ १७ गते राति १२ बजेदेखि सुरु भई २०८३ असार ७ गते राति १२ बजेसम्म खुला रहनेछ । सरकारी प्रक्रियामार्फत इजरायल जान चाहने उम्मेदवारका लागि निश्चित योग्यता र मापदण्ड तोकिएको छ । आवेदन दिने व्यक्ति २५ वर्ष पूरा भई ४५ वर्ष ननाघेको नेपाली नागरिक हुनुपर्नेछ । साथै, आवेदकको शारीरिक उचाइ कम्तीमा १.५ मिटर र तौल न्यूनतम ४५ किलोग्राम हुनुपर्ने विभागले जनाएको छ ।