मलेसियाको भर्ती प्रणालीमा फेरबदल, नेपाली श्रमिक पठाउने प्रक्रिया थप अन्योलमा

काठमाडौं । मलेसियामा नेपाली श्रमिक पठाउने प्रक्रियामा देखिएको विवाद समाधान हुनुको सट्टा थप पेचिलो बन्दै गएको छ। मलेसियाले नेपालका सीमित म्यानपावर कम्पनीलाई मात्र कामदार भर्तीको अधिकार दिने व्यवस्थालाई विस्तार गर्दै तिनकै मातहतमा थप २५० कम्पनीलाई ‘सब–एजेन्ट’का रूपमा सूचीकृत गरेपछि नेपाली वैदेशिक रोजगार व्यवसायी असन्तुष्ट बनेका छन्।

मलेसियाको फरेन वर्कर सेन्ट्रल म्यानेजमेन्ट सिस्टम (एफडब्लूसीएमएस) अन्तर्गत यसअघि नेपालका २५ वटा म्यानपावर कम्पनीलाई मुख्य कन्ट्रयाक्टरका रूपमा छनोट गरिएको थियो। उक्त व्यवस्थाप्रति नै नेपालका व्यवसायीले असहमति जनाउँदै आएका थिए।