देशका विभिन्न स्थानमा भएका छुट्टाछुट्टै सवारी दुर्घटनामा ६ जनाको मृत्यु

काठमाडौँ । देशका विभिन्न जिल्लाहरूमा भएका छुट्टाछुट्टै सवारी दुर्घटनाहरूमा परी ६ जनाको मृत्यु भएको छ। धनुषा, चितवन, नवलपरासी पश्चिम, रूकुम पश्चिम, बैतडी र उदयपुरमा भएका यी दुर्घटनामा अन्य केही व्यक्ति घाइते भएका छन्।

धनुषाको धनौजी गाउँपालिका–२ गोरदाहास्थित सडकमा गोरदाहाबाट जनकपुरतर्फ जाँदै गरेको प्र.२–०२–००२ प ७७४५ नम्बरको मोटरसाइकल अनियन्त्रित भई शुक्रबार बेलुकी दुर्घटना हुँदा एक जनाको मृत्यु भएको छ। मृत्यु हुनेमा मोटरसाइकलमा सवार जनकपुरधाम उपमहानगरपालिका–१ बस्ने ४५ वर्षीया मन्जु देवी गुप्ता रहेकी छन्। दुर्घटनामा गम्भीर घाइते भएकी उनको प्रादेशिक अस्पताल जनकपुरमा उपचारको क्रममा मृत्यु भएको हो।