बाढीका मृतकको सम्झनामा राष्ट्रिय एकता दलबाट तर्पण र श्रद्धाञ्जली [तस्बिरहरू]

काठमाडौँ । राष्ट्रिय एकता दलले भोटेकोशी बाढीमा ज्यान गुमाएका व्यक्तिहरूको आत्मा शान्ति, सद्गति र मोक्षको कामना गर्दै आज पशुपतिनाथ मन्दिरस्थित बागमती घाटमा जल तर्पण तथा श्रद्धाञ्जली कार्यक्रम सम्पन्न गरेको छ ।

हिन्दू परम्परा अनुसार औँसीको पावन अवसर पारेर आयोजना गरिएको उक्त कार्यक्रममा दिवङ्गतहरूप्रति श्रद्धापूर्वक जल अर्पण गरिएको थियो । श्री पशुपतिनाथ मन्दिरको पूर्वी गेटस्थित बागमती घाटमा अपराह्न ४ बजे सम्पन्न सो कार्यक्रममा राष्ट्रिय एकता दलका अध्यक्ष विनय यादव, केन्द्रीय नेता तोयानाथ दाहाल, पुस्ता लामा (पाथीभरा माता), विनोद सिंह लगायतका नेता तथा कार्यकर्ताहरूको उपस्थिति रहेको थियो।