बाढीले क्षति पुर्‍याएको बीपी राजमार्ग पुनर्निर्माण तीव्र, जाइकाको अनुदानमा दुई लेन बन्ने

काठमाडौँ । बीपी राजमार्ग अन्तर्गत काभ्रे–सिन्धुली खण्डको काभ्रेको पिप्लेदेखि सिन्धुलीको बर्खेखोलासम्म बाँकी रहेको सडक खण्ड जापान अन्तर्राष्ट्रिय सहयोग नियोग (जाइका) को २ अर्ब ६० करोड रुपैयाँ अनुदान सहयोगमा दुई लेनमा निर्माण गरिने भएको छ। ३.२ किलोमिटर लामो यस सडक खण्डको निर्माण ठेक्का जापानी कम्पनी शिमिजु कर्पोरेसनले लिएको छ भने यसको औपचारिक शिलान्याससमेत भइसकेको छ।

वि.सं. २०८१ सालको असोजमा आएको भीषण बाढीले भकुण्डेबेँसीदेखि नेपालथोकसम्मको ३०।५ किलोमिटर बीपी राजमार्गमा ठूलो क्षति पुर्‍याएपछि उक्त क्षतिग्रस्त सडक मध्ये २७।३ किलोमिटर सडक पुनर्निर्माणका लागि एक वर्षअघि नै ठेक्का प्रक्रिया अघि बढाइएको थियो।