उदयपुरको बोप्ताङ : नयाँ प्याराग्लाइडिङ ‘हब’को सम्भावना

१४ जेठ, धनकुटा । बिहानको कुहिरो हट्दै जाँदा सप्तकोशीमाथिको आकाश खुल्छ । त्यससँगै उदयपुरको बेलका नगरपालिका–८ स्थित बोप्ताङ डाँडामा रंगीन प्याराग्लाइडिङ उडाउने तयारी सुरु हुन्छ । प्रशिक्षकको निर्देशन सुन्दै केही युवा उडानका लागि तयार भइरहेका हुन्छन् । केही क्षणमै उनीहरू आकाशमा पुग्छन् र तल फैलिएको हरियाली जंगल, चुरे क्षेत्र र परसम्म बगिरहेको सप्तकोशी नदीको दृश्यले रोमाञ्चित हुन्छन् ।

केही वर्षअघिसम्म सामान्य ग्रामीण डाँडाका रूपमा चिनिने बोप्ताङ अहिले भने पूर्वी नेपालमै प्याराग्लाइडिङ सिकाइ केन्द्रका रूपमा परिचित बन्दै गएको छ । यहाँ सञ्चालनमा रहेको ‘फ्लाइङ अन्डर प्याराग्लाइडिङ स्कुल उदयपुर प्रालि’ले आधारभूत प्याराग्लाइडिङ पाइलट तालिम सञ्चालन गर्न थालेपछि नेपालका विभिन्न जिल्लासँगै विदेशबाट समेत प्रशिक्षार्थी आउन थालेका छन् ।