सात महिनापछि कोशी खेलकुद बोर्डले पायो नेतृत्व

विराटनगर : कोशी प्रदेश खेलकुद विकास बोर्डले सात महिनापछि नयाँ सदस्य सचिव पाएको छ । प्रदेश सरकारले सुनसरीको इनरुवाका विप्लव घोषलाई बोर्डको सदस्य सचिव नियुक्त गरेको हो ।

सरकारले बुधबार राति सदस्य सचिवसहित पदाधिकारी र सदस्य गरी ११ जनाको नियुक्ति गरेसँगै लामो समयदेखि रिक्त रहेको बोर्डले पूर्णता पाउने प्रक्रिया अघि बढेको छ । लामो समयदेखि बोर्ड नेतृत्वविहीन हुँदा खेलकुदका गतिविधि ठप्प बनेका थिए । इनरुवा नगरपालिका–३ निवासी घोष खेलकुद क्षेत्रमा पुराना अनुहारका रूपमा परिचित छन् । उनी कराँतेका पूर्व राष्ट्रिय खेलाडी हुन् भने क्रिकेट गतिविधिमा पनि लामो समयदेखि सक्रिय रहँदै आएका छन् ।