चन्द्रमाको दक्षिणी ध्रुवमा सतहमुनि बरफको सङ्केत

नयाँ दिल्ली । भारतको अन्तरिक्ष अनुसन्धान संस्था इसरोको चन्द्र अभियान चन्द्रयान–२ ले चन्द्रमाबारे एक महत्त्वपूर्ण वैज्ञानिक खोज गरेको छ । वैज्ञानिकहरूले चन्द्रमाको दक्षिणी ध्रुव नजिक रहेका गहिरा क्रेटरहरूभित्र सतहमुनि पानीको बरफ रहेको बलियो सङ्केत फेला पारेका छन् । यो खोज इसरोको चन्द्रयान–२ अर्बिटरबाट प्राप्त तथ्याङ्कका आधारमा गरिएको हो ।

यो अध्ययन अहमदाबादस्थित फिजिकल रिसर्च ल्याबोरेटरी (पीआरएल) का वैज्ञानिकहरूले गरेका हुन् । उनीहरूले चन्द्रमाको दक्षिणी ध्रुव क्षेत्रमा रहेका ती क्रेटरहरूको अध्ययन गरेका थिए, जहाँ कहिल्यै सूर्यको प्रकाश पुग्दैन । यी क्षेत्रलाई स्थायी रूपमा छायामा रहने क्षेत्र भनिन्छ । यहाँ तापक्रम माइनस २४८ डिग्री सेल्सियससम्म झर्ने भएकाले बरफ लामो समयसम्म सुरक्षित रहन सक्ने सम्भावना हुन्छ ।