स्वादको मोहले बिग्रँदै बालबालिकाको स्वास्थ्य: यसरी घरमै बनाउन सकिन्छ स्वस्थकर खाजा

काठमाडौं- चितवनस्थित भरतपुर–४ की श्रेयालाई विद्यालयमा खाजाको रूपमा चाउचाउ, चाउमिन, पास्ता जस्ता खानेकुरा लैजान मनपर्छ। हप्ताको ३/४ दिन उनको खाजा यस्तै केही जङ्क फूड हुने गर्छ। अनि घर फर्कँदा पसलमा राखिएका चिनीजन्य गुलिया पेय पदार्थ र चकलेटले उनलाई फेरि पनि लोभ्याउँछ।

घरको खाना र फलफूल उनको लागि ‘बोरिङ’ बनिसकेको छ। उमेरले ७ वर्ष भएकी श्रेया भर्खरै कक्षा २ मा अध्ययनरत छिन्। तर उनलाई विद्यालय पठाउने बेला खाजाको व्यवस्थापन गर्नमै उनकी आमा चन्दालाई दिक्क लाग्छ। कारण हो— घरमा बनाएको खाना खान मन नगर्ने तर बाहिरी प्रशोधित तयारी खाना मात्र खोज्ने।