माछापालनबाट वार्षिक १५ लाख बचत, ८ जनालाई रोजगारी

कैलाली– कैलालीको कैलारी गाउँपालिका–४ का किसान हेमन्त खरेलले माछापालन व्यवसायबाट वार्षिक १५ लाख रुपैयाँसम्म बचत गर्दै आएका छन्। ११ वर्षअघि १२ हजार रुपैयाँबाट सुरु गरेको व्यवसाय विस्तार गर्दै उनले अहिले आफ्नै जमिनमा चारवटा ठूला पोखरीमा व्यावसायिक माछापालन गरिरहेका छन्।

विदेश गएर काम गर्नुभन्दा स्वदेशमै केही गर्न सकिन्छ भन्ने सोचले माछापालन सुरु गरेका खरेलका लागि अहिले यही व्यवसाय आम्दानीको मुख्य स्रोत बनेको छ। उनका अनुसार व्यवसायमा हालसम्म करिब ५० लाख रुपैयाँ लगानी भइसकेको छ भने वार्षिक कारोबार ६५ लाख रुपैयाँ हाराहारी हुने गरेको छ। सबै खर्च कटाएर करिब १५ लाख रुपैयाँ बचत हुने गरेको उनले बताए।