नवलपरासीदेखि नेपाल–भारत सीमासम्मको १८ किमि विद्युत प्रसारण लाइनको निर्माण सकियो

परासी : नेपाल सरकार मिलेनियम च्यालेञ्ज एकाउण्ट नेपाल विकास समिति (एमसिए–नेपाल) ले निर्माण गरेको ४०० केभीको विद्युत प्रसारण लाइन अन्तर्गत नवलपरासीको १८ किलोमिटरको अन्तरदेशीय विद्युत प्रसारण लाइनको पूरा भएको छ। नवलपरासीको सुनवल नगरपालिका–१३ सूर्यबस्तीस्थित न्यू बुटवल सबस्टेशनबाट नेपाल–भारतको सीमा नाकाको अन्तिम विन्दुमा रहेको पाल्हीनन्दन गाउँपालिका–१ महेशपुरसम्मको प्रसारण लाइनको निर्माण काम पूरा भएको हो।

एमसिए–नेपालले आइतबार सबस्टेशनमा एक कार्यक्रमको आयोजना गरी निर्माण सम्पन्न भएको जानकारी दिएको हो। निर्माण सम्पन्न भएपछि निर्माण कम्पनी ‘ट्रान्सरेल लाइटिङ लिमिटेड’ भारतका सहायक निर्देशक राजिव कुटवालले एमसिए–नेपालका कार्यकारी निर्देशक खड्गबहादुर विष्टलाई प्रसारण लाइनको सांकेतिक टावर हस्तान्तरण गरेका थिए। सुनवल, रामग्राम नगरपालिका हुँदै पाल्हीनन्दनको दसगजा नजिकसम्म पुगेको यस खण्डमा ५३ वटा टावर निर्माण गरिएको छ। एमसिए– नेपालले निर्धारित समयमै निर्माण पूरा भएको जनाएको छ। प्रसारण लाइनको निर्माण सम्पन्न भएसँगै नेपालतर्फ एमसिए–नेपालले गर्नुपर्ने सीमापार विद्युत प्रसारसम्बन्धीका निर्माण कार्य पूरा भएको छ।