ओली जोगाउँदै बादल, बादल बोक्दै ओली

काठमाडौँ- सत्ता र शक्तिको केन्द्रबाट कहिल्यै टाढा नपरेका रामबहादुर थापा ‘बादल’ अहिले नेकपा एमालेभित्र अध्यक्ष केपी शर्मा ओलीको सबैभन्दा भरपर्दा रक्षकका रूपमा उभिएका छन्। ओलीको नेतृत्वमाथि प्रश्न उठाउँदै एमाले पुनर्गठनको आवाज चर्किरहेका बेला बादल भने ओलीको बचाउमा उभिएका हुन्। यसले एमालेभित्र ओली-बादल समीकरण सत्ता र शक्ति जोगाउने पारस्परिक सहारामा बदलिएको देखिएको छ।

२०७४ सालको निर्वाचनमा नेकपा एमाले र तत्कालीन नेकपा माओवादीले वाम गठबन्धन बनाएर चुनाव लडे। गठबन्धनको बलमा झन्डै दुईतिहाई मत पाएपछि दुई पार्टीबीच एकताको वातावरण बन्यो र नेपाल कम्युनिस्ट पार्टी (नेकपा) गठन भयो। त्यसपछि केपी शर्मा ओली प्रधानमन्त्री बने भने माओवादीको कोटाबाट बादल गृहमन्त्री बने।