लुम्बिनीका विद्युतीय बसः अन्य विमानस्थलमा सेवा सुरु, भैरहवामा भने अझै अलपत्र

बुटवल । लुम्बिनीमा वर्षौंदेखि अलपत्र विद्युतीय बसहरूलाई विभिन्न विमानस्थलमा सञ्चालन गर्ने सरकारी निर्णयपछि तीन वटा विमानस्थलमा सेवा सुरु भए पनि गौतमबुद्ध अन्तर्राष्ट्रिय विमानस्थलमा राखिएका दुई बस भने अझै सञ्चालनमा आउन सकेका छैनन् ।

संस्कृति, पर्यटन तथा नागरिक उड्डयन मन्त्रालयको सचिवस्तरीय निर्णयअनुसार गत चैतमा लुम्बिनी विकास कोषले ती बसहरू नेपाल नागरिक उड्डयन प्राधिकरणमार्फत पोखरा, सुर्खेत, नेपालगञ्ज र धनगढी विमानस्थलमा सञ्चालनका लागि पठाएको थियो । सुरुमा पाँचमध्ये दुई बस पोखरा पठाउने योजना भए पनि गौतमबुद्ध अन्तर्राष्ट्रिय विमानस्थलमा आवश्यकता पर्ने भन्दै ती बस यतै रोकिएका थिए । त्यसपछि बाँकी तीनवटा बस चैत अन्तिममा नेपालगञ्ज, सुर्खेत र धनगढी विमानस्थल पठाइएको थियो ।