लोकप्रियतावादका नाममा गणतन्त्रको आधार कमजोर पार्ने प्रयास भइरहेको छ : मुख्यमन्त्री कार्की

कोशी प्रदेशका मुख्यमन्त्री हिक्मतकुमार कार्कीले लोकप्रियतावादका नाममा गणतन्त्रका आधारलाई कमजोर पार्ने प्रयास भइरहेको बताएका छन्। शुक्रबार गणतन्त्र दिवसका अवसरमा कोशी प्रदेश सकारले विराटनगरमा आयोजना गरेको समारोहलाई सम्बोधन गर्दै मुख्यमन्त्री कार्कीले यस्तो बताएका हुन्।

मुख्यमन्त्री कार्कीले भने, 'पछिल्लो समय लोकप्रियतावादको नाममा लोकतान्त्रिक गणतन्त्रका आधारमाथि नै प्रश्न उठाउने तथा राज्यका संस्थाप्रति अविश्वास फैलाउने प्रवृत्ति देखिन थालेका छन्।' उनले लोकतन्त्र र गणतन्त्र प्राप्तिका लागि संघर्ष गरेका शक्तिहरूबीच सहकार्य, समन्वय र आपसी विश्वासको वातावरण निर्माण गरी गणतन्त्रका उपलब्धिलाई थप सुदृढ र संस्थागत बनाउनुपर्ने आवश्यकता औँल्याए।