देउवा-कोइरालालाई नपर्खिने कांग्रेस संस्थापनको संकेत

नेपाली कांग्रेसमा क्रियाशील सदस्यता अद्यावधिकको विवादले नयाँ मोड लिने संकेत देखिएको छ। विशेष महाधिवेशनमा सहभागी नभएका निवर्तमान सभापति शेरबहादुर देउवा र नेता शेखर कोइरालापक्षीय नेताहरू अद्यावधिक प्रक्रियामा सामेल हुन निरन्तर अनिच्छुक देखिएपछि संस्थापन पक्षले पनि उनीहरूलाई थप नपर्खिने संकेत गरेको हो।

सभापति गगन थापा नेतृत्वको संस्थापन पक्ष विशेष महाधिवेशन बहिष्कार गरेका समूहलाई समेटेर अघि बढ्ने प्रयासमा रहेको बताउँदै आएको छ। तर, देउवा-कोइराला पक्षका शीर्ष नेताहरू नै सदस्यता अद्यावधिकमा सहभागी नभएपछि संस्थापन पक्ष थप म्याद नदिई विधानअनुसार अघि बढ्ने मनस्थितिमा देखिएको हो।