अवैध तथा असुरक्षित सामान बिक्री गरेको आरोपमा टेमुलाई युरोपमा २० करोड युरो जरिवाना

ब्रसेल्स । चिनियाँ अनलाइन खुद्रा विक्रेता कम्पनी टेमुलाई आफ्नो प्लेटफर्ममा अवैध तथा असुरक्षित सामान बिक्री हुन दिएको आरोपमा यूरोपेली संघ (ईयू)ले २० करोड युरो (झन्डै २३ करोड २० लाख अमेरिकी डलर) जरिवाना तिराएको छ । युरोपेली आयोगका अनुसार टेमुले खतरनाक शिशु खेलौना, खराब चार्जरजस्ता उत्पादनबाट उपभोक्तालाई हुन सक्ने जोखिम पहिचान, विश्लेषण र मूल्याङ्कन गर्न पर्याप्त सावधानी अपनाउन असफल भएको थियो ।

टेमुमाथि सन २०२४ अक्टोबरदेखि ईयूको डिजिटल सेवा कानुनअन्तर्गत ‘धेरै ठुलो अनलाइन प्लेटफर्म’का रूपमा आफ्नो दायित्व पूरा गरेको छ कि छैन भन्ने विषयमा अनुसन्धान भइरहेको थियो । अनुसन्धानका क्रममा स्वतन्त्र परीक्षण संस्थामार्फत गरिएको ‘मिस्ट्री सपिङ’मा टेमुबाट खरिद गरिएका धेरै चार्जर आधारभूत विद्युतीय सुरक्षा परीक्षणमा असफल भएका थिए । त्यस्तै, धेरै शिशु खेलौनामा कानुनी सीमा भन्दा बढी रसायन भेटिएको तथा निस्कन सक्ने साना भागहरूले बच्चालाई निसास्सिने जोखिम रहेको पाइएको थियो ।