हुप्सेकोटको घाँगी भीरमा ६ महिनादेखि निस्किरहेछ धुवाँको मुस्लो (तस्बिर)

पूर्वी नवलपरासी । पूर्वी नवलपरासीको हुप्सेकोट गाउँपालिका–६ स्थित घाँगी भीरबाट पछिल्लो ६ महिनादेखि निरन्तर धुवाँको मुस्लो निस्किरहेको छ । पेलेगा र भडारी गाउँको बिचमा पर्ने पहाडमा दुई वर्षअघि पहिरो गएको थियो । त्यही ठाउँमा जमिन मुनिबाट गत चैतदेखि निरन्तर धुवाँ निस्किरहेको स्थानीय दानबहादुर रानामगरले बताए ।

करिब १८ वर्ष पहिले सोही क्षेत्रको दक्षिण भेगमा पनि धुवाँको मुस्लो निस्किएको थियो । केही समयपछि त्यहाँ आफैँ निभ्यो, अहिले फेरि अर्को ठाउँमा धुवाँ निस्किएको हो । ‘धुवाँ अमिलो, बारुदजस्तो स्वादको मानेका छौँ । नजिकको बस्तीका बासिन्दालाई श्वास फेर्न गाह्रो बनाइसक्यो,’ उनले सुनाए ।