घाँस काट्दा भिरबाट खसेर महिलाको मृत्यु

स्याङ्जामा भिरबाट खसेर एक महिलाका मृत्यु भएको छ । अर्जुनचौपारी गाउँपालिका–४, सुनार टोलकी ३५ वर्षीया सबिना सुनारको भिरबाट लडेर मृत्यु भएको हो । भिरबाट खसेर गम्भिर घाइते भएकी सुनारको उपचारका क्रममा मृत्यु भएको जिल्ला प्रहरी कार्यालय स्याङ्जाका सूचना अधिकारी एवं प्रहरी नायव उपरीक्षक रमेशदत्त अवस्थीले जानकारी दिनु भयो ।

उहाँका अनुसार सोमबार बिहान स्थानीय मेलपानी भिरमा घाँस काट्ने क्रममा अचानक सन्तुलन गुमाउँदा सुनार झण्डै चार सय मिटर तल खसेर गम्भीर घाइते हुनु भएको थियो । घाइते सुनारलाई प्रहरी तथा स्थानीयले उपचारका लागि प्रदेश अस्पताल पुतलीबजार, स्याङ्जा लगेको भए पनि अस्पताल पुर्याउने बित्तिकै डाक्टरले मृत घोषणा गरेका प्रहरीले जनाएको छ ।