गगनसँग हायलकायल देउवा, भावी रणनीति के ?

काठमाडौँ । नेपाली काँग्रेस संस्थापन पक्षले पार्टीको विवादलाई सामान्यीकरण गर्न शनिबारको बैठकमार्फत १४औँ महाधिवेशनमा निर्वाचित सबै केन्द्रीय सदस्यलाई नयाँ कार्यसमितिमा समाहित गरेपनि देउवा पक्षले भने यसलाई सहमतिको विन्दू मानेको छैन । शनिबार बसेको काँग्रेसको कार्यसम्पादन समितिको बैठकले अघिल्लो महाधिवशेनमा केन्द्रीय सदस्यमा निर्वाचित तर दोस्रो विशेष महाधिवेशनपछि समितिमा नरहेका सबैलाई नयाँ कार्यसमितिमा समावेश गर्ने निर्णय गरेको छ ।

१४औँ महाधिवेशनमा निर्वाचित केन्द्रीय सदस्यहरुलाईं वर्तमान कमिटिमा समावेश गराउनुपर्ने विषय देउवा पक्षले नै माग गर्दै आएको विषय हो । यसअघि देउवा पक्षमै रहेका पूर्वकार्यवाहक सभापति पूर्णबहादुर खड्काले नै पूर्व केन्द्रीय सदस्यहरुलाई नयाँ कार्यसमितिमा समावेश गराउनेसहितका ८ बुँदे प्रस्ताव गगनलाई पठाएका थिए । प्रमुखतः यो माग नै नेपाली काँग्रेसभित्रको विवाद समाधानको प्रमुख एजेण्डा थियो । यो निर्णयसँगै अब पार्टी एकता हुने संभावना बढेको आम रुपमा विश्लेषण गरिएको छ । यद्यपि शेरबहादुर देउवा पक्षले भने केन्द्रीय समितिमा पूराना पदाधिकारीलाई समावेश गर्दैमा आफूहरु महाधिवेशनमा सहभागी हुन नसक्ने भन्दै थप कडा शर्तहरु पेश गर्न थालेको छ ।