भोटेकोशी बाढीको कहर : रसुवाका जलविद्युत् आयोजनामा सयौं कर्मचारी सम्पर्कविहीन, उद्धारमा सकस

काठमाडौं- भोटेकोशी नदीमा आएको भीषण बाढीका कारण रसुवाका विभिन्न जलविद्युत् आयोजनामा कार्यरत सयौँ कर्मचारी तथा कामदार सम्पर्कविहीन भएका छन्। प्रारम्भिक विवरणअनुसार माथिल्लो त्रिशूली–१, रसुवागढी, मैलुङ खोला, रसुवा भोटेकोशी र लाङटाङ खोला जलविद्युत् आयोजनामा कार्यरत कर्मचारी तथा कामदारको अवस्था अझै अज्ञात रहेको छ।

निर्माणाधीन २१६ मेगावाटको माथिल्लो त्रिशूली–१ आयोजनामा कार्यरत एन्ड्रिज हाइड्रोका ७६ जना सम्पर्कविहीन छन्। उनीहरूमध्ये करिब आधा नेपाली र आधा विदेशी नागरिक रहेको बताइएको छ। आयोजनाको प्रवर्द्धक नेपाल वाटर एन्ड इनर्जी डेभलपमेन्ट कम्पनीका ११ जना पनि सम्पर्कविहीन छन्। तीमध्ये आठ जना कोरियन नागरिक रहेका छन्।