जलवायु परिवर्तनको नयाँ जोखिम

२०८२ असार २४ मा चीनको तिब्बतको जिरोङ काउन्टीबाट सुरु भएको आकस्मिक बाढीको शक्तिशाली बहाव नेपालतर्फको रसुवाको रसुवागढी हुँदै भोटेकोसी र त्रिशूली नदी प्रणालीमा प्रवेश गरेको थियो। बाढीले सीमावर्ती संरचना, पुल, सडक, व्यापारिक पूर्वाधार र जलविद्युत् आयोजनामा ठुलो क्षति पुर्‍याएको थियो। यसको प्रभाव करिब १०० किलोमिटर तलसम्म देखिएको थियो। त्यस घटनामा कम्तीमा ११ जनाको मृत्यु भएको र १७ जना बेपत्ता भएको विवरण तत्कालीन समयमा सार्वजनिक गरिएको थियो। त्यसको एक वर्षपछि २०८३ भदौ १० गते सोही क्षेत्र र नदी प्रणालीमा पानीको बहाबको मात्रा र त्यसले ल्याएको मानवीय तथा भौतिक क्षतिलाई हेर्दा २०८२ को भन्दा ५० औं गुणाभन्दा बढी विनाशकारी देखिएको छ।

प्रारम्भिक रिपोर्टअनुसार तिब्बततर्फ भएको ठुलो हिमचट्टान पहिरो खसेर ल्हेन्दे नदीमा अचानक अत्यधिक पानी तथा लेदोको बहाव उत्पन्न भई यो घटना निम्त्याएको अनुमान गरिएको छ। यस आकस्मिक बाढीले रसुवा र नुवाकोटका भोटेकोसी र त्रिशूली नदीको तटीय क्षेत्रका साँघुरा गल्छी वा उपत्यकामा बसोबास गर्ने, सो क्षेत्रबाट यात्रा गरिरहेका यात्रु र सो क्षेत्रमा निर्माणाधीन जलविद्युत् आयोजनामा कार्यरत व्यक्तिहरू ठुलो संख्यामा हताहती भएका छन्। सयौं मानिसहरू हराइरहेका छन्।