वर्षौँदेखि काम अलपत्र पार्ने १६ रुग्ण ठेक्का एकसाथ तोडिँदै

जुम्ला । जुम्लास्थित सडक डिभिजन कार्यालयले कर्णाली राजमार्गका सडक निर्माणका लागि ठेक्का सम्झौता गरेर पनि वर्षौँदेखि काम अलपत्र पारेका १६ वटा रुग्ण ठेक्का एकसाथ तोड्न प्रक्रिया सुरु गरेको छ। कार्यालयले कालिकोट, जुम्ला र मुगुमा सञ्चालित ती आयोजनाहरूले समयमा काम सम्पन्न नगरेपछि ठेक्का अन्त्य गरिनेसम्बन्धी १५ दिने सार्वजनिक सूचना प्रकाशित गरेको छ।

सडक डिभिजन कार्यालयका सूचना अधिकारी सौरभकुमार सिंहका अनुसार आर्थिक वर्ष २०७४/७५ देखि २०८२/८३ सम्म सम्झौता भएका कालिकोटका १२, जुम्लाका तीन र मुगु जिल्लाको एक गरी १६ वटा रुग्ण ठेक्का तोड्नका लागि प्रक्रिया अगाडि बढाइएको हो। ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि कार्यालयले यो कदम चालेको सिंहको भनाइ छ।