भेनेजुएलामा भूकम्प जाँदा गुगलको एन्ड्रोइड सिस्टमले पठायो १ करोड १४ लाख मानिसलाई पूर्वचेतावनी

काठमाडौँ । हालै भेनेजुएलामा गएका लगातार दुई शक्तिशाली भूकम्पका क्रममा गुगलको एन्ड्रोइड भूकम्प चेतावनी प्रणालीले करिब एक करोड १४ लाख मानिसहरूलाई भूकम्प आउनुअगावै पूर्वचेतावनी (अलर्ट) पठाएको छ । द न्यु योर्क टाइम्सका अनुसार आफ्नै राष्ट्रिय प्रारम्भिक चेतावनी प्रणाली नभएको भेनेजुएलामा एन्ड्रोइड फोनको प्रविधि प्रयोग गरी भूकम्प आउनुअघि केही सेकेन्डदेखि दुई मिनेटसम्मको समय रहँदै मानिसलाई सचेत गराइएको हो ।

भेनेजुएलामा गएका दुई भूकम्पमध्ये पहिलो ७.२ र दोस्रो ७.५ रेक्टर स्केलका थिए । दोस्रो भूकम्प सन् १९०० यताकै सबैभन्दा शक्तिशाली भएको बताइएको छ । गुगलको यो प्रणालीले विश्वभरका दुई अर्बभन्दा बढी एन्ड्रोइड फोनमा राखिएको ‘एक्सेलेरोमिटर’ सेन्सरको सहयोगमा भूकम्पीय तरंग पहिचान गरी यो चेतावनी पठाएको हो ।