अफगानिस्तानमा ट्रक पल्टिँदा १८ जनाको मृत्यु

पूर्वी अफगानिस्तानमा शनिबार ट्रक पल्टिएर दुर्घटना हुदाँ १० बालबालिकासहित १८ जनाको मृत्यु भएको प्रान्तीय अधिकारीलाई उद्धृत गर्दै एएफपीले जनाएको छ। लगमान प्रान्तका गभर्नरका प्रवक्ता अब्दुल मलिक नियाजयका अनुसार ट्रकमा पाकिस्तानबाट फर्केका अफगान परिवार थिए।

दश जना बालबालिका, पाँच जना महिला र तीन जना पुरुषसहित १८ जनाको मृत्यु भएको पुष्टि गर्दै २९ जना घाइते भएको प्रवक्ताले बताएका छन्। पूर्वी अफगानिस्तानको जलालाबाद र राजधानी काबुलबिचको सडकमा ट्रक दुर्घटना भएको जानाइएको छ।