पार्टीभित्र राजनीतिक घेराबन्दीमा एमाले अध्यक्ष ओली, विष्णु र शंकरले साथ छोड्दा बादलको पाए साथ

काठमाडौं । नेकपा एमालेका अध्यक्ष केपी शर्मा ओली यतिबेला चरम राजनीतिक घेराबन्दीमा परेका छन् । करीब ३० वर्षदेखि ओलीसँगै रहेका उपाध्यक्ष विष्णु पौडेल र पृथ्वीसुब्बा गुरुङ, महासचिव शंकर पोखरेललगायतका नेताहरु पार्टी पुनर्गठन गर्न अध्यक्ष ओलीले राजीनामा दिनु पर्ने भनेर लविङ गरिरहेका छन् । पार्टीका सबै तहका कमिटिमा समेत अध्यक्ष ओलीको बहिर्गमनको आवाज उठिरहेको छ ।

पार्टीको सत्ता नछाड्ने मनस्थितिमा रहेको ओलीका लागि निर्वाचन समीक्षा र पार्टी पुनर्गठन प्रतिवेदन काउछो बनेर आएको छ । फागुन २१ को चुनावमा शर्मनाक पराजय व्यहोरेपछि एमालेले जेठ १० गते वरिष्ठ उपाध्यक्ष रामबहादुर थापा बादलको संयोजकत्वमा निर्वाचन समीक्षा तथा पार्टी पुनर्गठन कार्यदल बनाएको थियो।