कोशी प्रदेशसभाको गतिरोध अन्त्य, बजेटका प्राथमिकता र सिद्धान्त पेस

विराटनगर । कोशी प्रदेशसभामा जेठ १२ गतेदेखि जारी अवरोध दलहरूबिचको सहमतिसँगै अन्त्य भएको छ । प्रदेशसभाको बैठक बस्नु अगाडि आज बसेको कार्य व्यवस्था परामर्श समितिको बैठकमा सभामुख र दलका नेताहरूबिच गतिरोध अन्त्य गर्ने सहमति भएको हो ।

प्रदेश सरकारले संसदमा पेस गरेको नीति तथा कार्यक्रम प्रदेशसभाले सर्वसम्मत ढङ्गले पारित भएको भन्ने सभामुखको घोषणा सच्याउने र उक्त सहमति सभामुखले प्रदेशसभाको बैठकमा वाचन गर्ने सहमति भएसँगै गतिरोध अन्त्य भएको हो । सो सहमति अनुरूप सभामुख अम्बर बहादुर विष्टले सभामा पढेर सुनाएका थिए ।