भारतमा २ हजार भारुभन्दा कमको यूपीआई भुक्तानीमा कुनै शुल्क नलाग्ने

एजेन्सी । करोडौं भारतीयहरूका लागि युनिफाइड पेमेन्ट्स इन्टरफेस (यूपीआई) मार्फत भुक्तानी गर्नु दैनिक जीवनको नियमित हिस्सा बनिसकेको छ । क्यूआर कोडको द्रुत स्क्यान, पिन नम्बर प्रविष्टि र भुक्तानी सम्पन्न हुन्छ ।

तर, हालैको एक सरकारी सूचनाले प्रयोगकर्ताहरूलाई अन्ततः उच्च मूल्यको यूपीआई भुक्तानी गर्दा शुल्क लाग्न सक्छ कि सक्दैन भन्ने प्रश्न उब्जाएको छ । केन्द्र सरकारले सोमबार भुक्तानी तथा फर्स्यौट प्रणाली ऐन, २००७ अन्तर्गत एक सूचना जारी गर्दै २ हजार भारुसम्मको यूपीआई कारोबार र रुपे डेबिट कार्ड प्रयोग गरी गरिने भुक्तानीलाई बैंक तथा भुक्तानी प्रणाली प्रदायकहरूले शुल्क लगाउन नपाउने विद्युतीय भुक्तानी माध्यमको रूपमा तोकेको छ ।