टेलिकमको शेयर सर्वसाधारणलाई बेच्ने सरकारको तयारी

काठमाडौं । सरकारले नेपाल दूरसञ्चार कम्पनी लिमिटेड (नेपाल टेलिकम) मा रहेको आफ्नो सेयर स्वामित्व घटाएर ६६ प्रतिशतमा झार्ने घोषणा गरेको छ । आगामी आर्थिक वर्ष २०८३/८४ को बजेट वक्तव्यमार्फत संघीय सरकारको सेयर ६६ प्रतिशत कायम राखी बाँकी सेयर पुस मसान्तभित्र जनस्तरमा बिक्री गर्ने योजना अघि सारिएको हो। यसरी सेयर बिक्रीबाट प्राप्त हुने रकम नेपाललाई ‘टेक हब’ बनाउन उपयोग गरिने अर्थमन्त्री स्वर्णिम वाग्लेले बताए।

यसअघि पनि टेलिकममा सरकारको सेयर हिस्सा परिवर्तन गरी सर्वसाधारणको सहभागिता २५ प्रतिशतदेखि ३४ प्रतिशतसम्म पुर्‍याउने विषयमा चर्चा हुँदै आएको थियो। टेलिकममा विदेशी रणनीतिक साझेदार भित्र्याउने विषयमा पनि समय–समयमा बहस चल्दै आएको थियो। तर, यस पटक सरकारले जनस्तरमा सेयर लैजाने स्पष्ट बाटो समातेको छ। हाल टेलिकममा सरकारको ९१.४९ प्रतिशत, नागरिक लगानी कोषको ०.०३ प्रतिशत र सर्वसाधारण तथा कर्मचारीको ८.४८ प्रतिशत सेयर स्वामित्व छ।