आन्दोलित गोलभेँडा किसानसँग कृषिमन्त्रीले भनिन्- विचौलिया रोक्न कृषि विधेयक ल्याउँदैछौं

कृषि, वन तथा पर्यावरण मन्त्री गिता चौधरीले सडकमा गोलभेँडा फ्याँकेर आन्दोलनरत किसानहरूसँग छलफल गरेकी छन्। प्रदर्शनमा उत्रिएका किसानका प्रतिनिधिहरूलाई मन्त्री चौधरीले मन्त्रालयमै आमन्त्रण गरी उनीहरूका पीडा र मागबारे विस्तृत छलफल गरेकी हुन्।

छलफलका क्रममा मन्त्री चौधरीले भनिन्, ‘किसानले आफ्नो उत्पादनको उचित मूल्य पाऊन् भनेर हामीले कडा अनुगमनको व्यवस्था गरेका छौं। यसमा विचौलियाको चलखेल रोक्नका लागि कृषि विधेयक अघि बढाएका छौं।’ नयाँ कृषि ऐन बनेपछि विचौलियाको समस्या दीर्घकालीन रूपमा समाधान हुने उनले दाबी गरिन्।