जेनजी अभियन्ता अन्सारी मानवअधिकार आयोगको रोहबरमा रिहा

कीर्तिपुरस्थित सुकुमवासी होल्डिङ सेन्टरमा प्रहरी कारबाहीका क्रममा पक्राउ परेका जेनजी अभियन्ता माजिद अन्सारी राष्ट्रिय मानवअधिकार आयोगको रोहबरमा प्रहरी हिरासतबाट रिहा भएका छन्। उपचारका क्रममा त्रिभुवन विश्वविद्यालय शिक्षण अस्पतालमा भर्ना भएका अन्सारी बुधबार अस्पतालबाट डिस्चार्ज भएसँगै हिरासतमुक्त भएका हुन्।

शनिबार होल्डिङ सेन्टरमा भएको प्रहरी कारबाहीका क्रममा अन्सारी घाइते भएका थिए। पक्राउपछिको स्वास्थ्य अवस्था बिग्रिएपछि उनलाई उपचारका लागि शिक्षण अस्पताल लगिएको थियो, जहाँ केही दिन उपचारपछि चिकित्सकले डिस्चार्ज गरेका हुन्।