बजेट विवादले संकटमा सुदूरपश्चिम सरकार

सुदूरपश्चिम प्रदेशमा बजेट विवाद चर्किएपछि मुख्यमन्त्री कमलबहादुर शाहले नेकपा (एमाले) का मन्त्रीहरूलाई बर्खास्त गरेका छन्। त्यसलगत्तै एमालेले प्रदेश सरकारलाई दिएको समर्थन फिर्ता लिएको घोषणा गरेसँगै प्रदेश सरकार अल्पमतमा परेको छ। यससँगै नेपाली कांग्रेस र एमालेबीच करिब २५ महिनादेखि कायम रहेको गठबन्धन औपचारिक रूपमा टुटेको छ।

आर्थिक वर्ष २०८३/८४ को बजेट पुनर्लेखनको माग गर्दै एमालेका सांसदहरूले बजेटमाथि खर्च कटौती प्रस्ताव दर्ता गरेपछि सत्तारुढ नेपाली कांग्रेस र एमालेबीचको विवाद उत्कर्षमा पुगेको थियो। विवाद समाधानका लागि मुख्यमन्त्री शाह गत सोमबार काठमाडौं पुगेर नेपाली कांग्रेसका सभापति गगन थापा, उपसभापति विश्वप्रकाश शर्मा लगायत शीर्ष नेतासँग छलफल गरेका थिए। तर, केन्द्रस्तरीय छलफलबाट पनि सहमति जुट्न सकेन।