सेयर कारोबारमा कर बढाएपछि अर्थमन्त्रीले भने– पुँजीगत लाभकर अन्तिम नै हो, भ्रममा नपरौं

काठमाडौं । अर्थमन्त्री स्वर्णिम वाग्लेले सेयर कारोबारमा लाग्ने पुँजीगत लाभकर अन्तिम नै भएको बताएका छन् । यस्तो कारोबारमा उच्च दरमा कर बढाएपछि वाग्लेले लगानीकर्ताको मागअनुसार अन्तिम कर कायम गरेको औंल्याउन खोजेका छन् ।

सरकारले आगामी आवका लागि गत शुक्रबार २१ खर्ब २४ अर्ब ३४ करोड रुपियाँको बजेट ल्याएको थियो । बजेटबारे जानकारी दिन आइतबार अर्थ मन्त्रालयमा आयोजित पत्रकार सम्मेलनमा उनले पुँजीगत लाभकरमा लाग्ने कर अन्तिम भएको बताए । बजेटमा सरकारले अल्पकालिन सेयर कारोबारमा १० प्रतिशत र दीर्घकालिन कारोबारमा ७.५ प्रतिशत कर लगाउने निर्णय गरेको छ । यसअघि यो क्रमशः ७.५ प्रतिशत र ५ प्रतिशत थियो ।