इरानी आणविक केन्द्रमा निरीक्षण हुने सङ्केत

संयुक्त राष्ट्रसङ्घअन्तर्गतको अन्तर्राष्ट्रिय आणविक ऊर्जा एजेन्सी (आइएइए) का महानिर्देशक राफेल मारियानो ग्रोसीले इरानका आणविक संवर्धन केन्द्रमा आफ्ना निरीक्षकले पुनः पहुँच पाउने सङ्केत गर्नुभएको छ । अमेरिका र इरानबिच भएको अन्तरिम समझदारीअनुसार ती केन्द्रको निरीक्षण हुने उहाँको भनाइले युद्धपछिको आणविक विवाद समाधानतर्फ महत्त्वपूर्ण प्रगति भएको देखाएको छ ।

जापानको फुकुसिमा दाइची आणविक ऊर्जा केन्द्रको भ्रमणका क्रममा पत्रकारसँग कुरा गर्दै ग्रोसीले अमेरिका र इरानबिच भएका केही परस्परविरोधी अभिव्यक्तिलाई ‘शब्दको युद्ध’को संज्ञा दिनुभयो । उहाँले दुवै देशका राष्ट्रपतिले हस्ताक्षर गरेको समझदारीपत्रमा आइएइएद्वारा निरीक्षण गरिने कुरा स्पष्ट रूपमा उल्लेख गरिएको बताउनुभयो ।