घोषणाभन्दा कार्यान्वयनमा जोड देऊ

काभ्रेपलाञ्चोक जिल्लालाई पूर्णखोप सुनिश्चित तथा दिगोपना जिल्ला घोषणा गर्नु र धुलिखेल अस्पताललाई प्रदेशस्तरीय स्वास्थ्य विश्वविद्यालयका रूपमा विकास गर्ने बागमती प्रदेश सरकारको घोषणा स्वास्थ्य क्षेत्रका दृष्टिले सकारात्मक र दूरगामी महत्वका कदम हुन् । यस्ता निर्णयले सरकारले स्वास्थ्यलाई प्राथमिकतामा राख्न खोजेको सन्देश दिएका छन् । तर घोषणाको वास्तविक मूल्य त्यसको प्रभावकारी कार्यान्वयनबाट मात्र स्थापित हुन्छ । त्यसैले सरकारले घोषणा गर्नेभन्दा बढी त्यसलाई व्यवहारमा उतार्ने क्षमता देखाउन आवश्यक छ ।

नेपालले विगत तीन दशकमा खोप कार्यक्रममार्फत बालस्वास्थ्यमा उल्लेखनीय सफलता हासिल गरेको छ । दादुरा, रुबेला, पोलियोलगायतका रोग नियन्त्रणमा आउनु, बालमृत्युदर घट्नु र नियमित खोपप्रति समुदायको विश्वास बढ्नु राज्य, स्वास्थ्यकर्मी, महिला स्वास्थ्य स्वयंसेविका, स्थानीय तह तथा सञ्चारमाध्यमको संयुक्त प्रयासको परिणाम हो । पूर्णखोप सुनिश्चितता घोषणा अन्तिम उपलब्धि होइन, यो निरन्तर कायम राख्नुपर्ने दायित्व हो । हरेक वर्ष जन्मिने नयाँ बालबालिकाले समयमै सबै खोप पाउने सुनिश्चितता नै यसको वास्तविक सफलता हुनेछ ।