बहुदलीय जनवादको अगेनोमा रोटी सेक्ने र दाउरा बोक्नेबिचको द्वन्द्व

नेपाली राजनीतिक आकाशका चम्किलो नक्षत्र हुन् जननेता मदन भण्डारी । उनले देशलाई सम्भावित बर्बादी, रक्तपात र गृहयुद्धबाट बचाउन नेकपा (एमाले) को उदय गराउनु भयो । मातृभूमिको सार्वभौमसत्ता जोगाउन, वामपन्थी आन्दोलन बलियो बनाउँदै समग्र लोकतान्त्रिक आन्दोलनलाई सुदृढ पार्न उनको भूमिका महत्त्वपूर्ण छ ।

विचार, जाति, भाषा, धर्म, लिङ्ग र पुस्ताका संवेदना भड्काएर भू–राजनीतिक जटिलता र दाउपेचमार्फत मातृभूमिलाई कमजोर पार्ने तत्त्वहरू विरुद्ध मदन भण्डारीले नै सचेतनाको दियो बाल्नुभएको हो । भौगोलिक अखण्डताको रक्षा र भावनात्मक एकताको अपरिहार्यताबारे सबैभन्दा घन्किने स्वर उहाँकै थियो ।