सुदूरपश्चिमका मुख्यमन्त्रीलाई मार्गप्रशस्त गर्न नेकपाको आग्रह, आफ्नै नेतृत्वमा सरकार बनाउन वार्ता टोली

नेपाली कम्युनिस्ट पार्टी (नेकपा) ले सुदूरपश्चिम प्रदेशका मुख्यमन्त्री कमलबहादुर शाहको राजीनामा माग्दै आफ्नै नेतृत्वमा नयाँ सरकार गठनको पहल सुरु गरेको छ । बिहीबार बसेको नेकपाको संसदीय दलको बैठकले मुख्यमन्त्री शाह नेतृत्वको सरकारले बहुमत गुमाइसकेको निष्कर्ष निकाल्दै उनले तत्काल पदबाट राजीनामा दिएर नयाँ सरकार गठनका लागि मार्गप्रशस्त गर्नुपर्ने निर्णय गरेको हो ।

बैठकमा प्रदेशसभाको सबैभन्दा ठूलो दल भएकाले अब सरकारको नेतृत्व पनि नेकपाले नै गर्नुपर्नेमा सांसदहरू एकमत देखिएका थिए । त्यसका लागि अन्य दलसँग छलफल र सहमति जुटाउन पाँच सदस्यीय वार्ता टोली गठन गरिएको छ । वार्ता टोलीमा संसदीय दलका नेता खगराज भट्टसहित प्रदेशसभा सदस्यहरू प्रकाश रावल, मानबहादुर धामी, खुशीराम चौधरी र रमेश धामी रहेका छन् ।