नेपालले भारतको जग्गा मिचेको भन्नु प्रधानमन्त्रीको लज्जास्पद र आत्मघाती अभिव्यक्ति : निश्कल राई

काठमाडौँ । नेपाली कांग्रेसका सचेतक निश्कल राईले प्रधानमन्त्रीले ‘नेपालले पनि भारतको जग्गा मिचेको छ’ भनी दिएको अभिव्यक्तिप्रति आपत्ति जनाउँदै यसलाई राष्ट्रहित विपरीत र लज्जास्पद बताएका छन् । प्रतिनिधिसभाको बैठकमा आकस्मिक समयमा बोल्दै सचेतक राईले प्रधानमन्त्रीको उक्त भनाइले तीन करोड नेपालीको शिर निहुँरिएको र राष्ट्रिय स्वाभिमानमाथि धावा बोलेको बताए ।

सचेतक राईले संसद्को रोस्टममै उभिएर प्रधानमन्त्रीले दिएको यो अभिव्यक्ति नजिरका रूपमा स्थापित हुने खतरा औँल्याए । ‘प्रधानमन्त्री फेरि रोस्टममा उभिनुपर्छ र नेपालले कहाँ–कहाँ भारतको जग्गा मिच्यो, त्यसको एक–एक इन्चको हिसाब दिनुपर्छ। यो राष्ट्रिय सुरक्षाको गम्भीर विषय हो। भोलि भारतले यो अभिव्यक्तिको आधारमा जग्गा फिर्ता माग्यो भने कुन भूमि दिने हो,’ राईले भने ।