६ महानगरको ५४ अर्ब बजेट,पूर्वाधार विकासमा जोड

मुलुकका ६ महानगरपालिकाले आगामी आर्थिक वर्ष २०८३/८४ का लागि करिब ५४ अर्ब रुपैयाँभन्दा बढीको बजेट सार्वजनिक गरेका छन्। काठमाडौं, ललितपुर, पोखरा, भरतपुर, वीरगन्ज र विराटनगर महानगरपालिकाले सार्वजनिक गरेको बजेटमा पूर्वाधार विकास, शिक्षा, स्वास्थ्य, पर्यटन प्रवद्र्धन, सुशासन र सेवा प्रवाहलाई मुख्य प्राथमिकतामा राखिएको छ। यद्यपि, चालु आर्थिक वर्षमा बजेट खर्चको अवस्था कमजोर रहेकाले आगामी वर्षको कार्यान्वयन पक्ष भने चुनौतीपूर्ण देखिएको छ।

बजेट आकारको हिसाबले काठमाडौं महानगरपालिका सबैभन्दा ठूलो देखिएको छ। काठमाडौंले आगामी आवका लागि २५ अर्ब ८८ करोड ३० लाख रुपैयाँको बजेट ल्याएको छ, जुन अन्य पाँच महानगरपालिकाको संयुक्त बजेट बराबरको हाराहारीमा रहेको छ। महानगरले कुल बजेटको ६१ प्रतिशत अर्थात् १५ अर्ब ३१ करोड रुपैयाँ पूर्वाधार विकास क्षेत्रमा विनियोजन गरेको छ।