साउन १ देखि निजी अस्पतालमा उपचार महँगिने, सरकारले ३% ‘स्वास्थ्य समता शुल्क’ लागू गर्दै

काठमाडौं । साउन १ गतेदेखि देशभरका निजी अस्पताल, नर्सिङ होम, पोलिक्लिनिक, ल्याब, निजी मेडिकल कलेज तथा अन्य निजी स्वास्थ्य संस्थामा उपचार गराउने बिरामीले अब थप ३ प्रतिशत ‘स्वास्थ्य समता शुल्क’ तिर्नुपर्ने भएको छ। सरकारले आर्थिक ऐन, २०८३ मार्फत लागू गरेको नयाँ व्यवस्थाअनुसार यो शुल्क प्रत्यक्ष रूपमा बिरामीबाट असुल गरिनेछ।

आर्थिक ऐनको दफा १७ तथा अनुसूची–८ अनुसार निजी स्वास्थ्य संस्थाले बिरामीबाट लिने सबै प्रकारका सेवा शुल्कमा ३ प्रतिशत स्वास्थ्य समता शुल्क थप गर्नुपर्नेछ। सरकारले उक्त रकम गुणस्तरीय स्वास्थ्य सेवामा पहुँच विस्तार र स्वास्थ्य पूर्वाधार निर्माणमा खर्च गरिने जनाएको छ।