अब यूट्युबमै अमेजनका सामान सिफारिस गर्न मिल्ने, क्रिएटरले पाउनेछन् कमिसन

काठमाडौं । यूट्युबले आफ्नो सपिङ तथा एफिलिएट व्यवसाय विस्तार गर्दै अमेजनलाई पनि YouTube Shopping Affiliate Program मा जोडेको छ । यससँगै योग्य यूट्युब क्रिएटरले अमेजनका उत्पादन सिफारिस गरेर प्रत्यक्ष रूपमा कमिसन आम्दानी गर्न सक्ने भएका छन् । यूट्युबका प्रमुख कार्यकारी अधिकृत निल मोहनले सामाजिक सञ्जाल एक्समार्फत अमेजन कार्यक्रमको साझेदार बनेको जानकारी दिएका हुन् ।

नयाँ व्यवस्थाअनुसार कार्यक्रममा योग्य क्रिएटरले आफ्ना भिडियो, Shorts र Live Stream मा अमेजनका विभिन्न उत्पादन ट्याग वा लिंक राख्न सक्नेछन् । दर्शकले उक्त लिंकमार्फत उत्पादन खरिद गरेमा त्यसबाट प्राप्त बिक्रीका आधारमा क्रिएटरले कमिसन पाउनेछन् । यसले यूट्युबमा उत्पादनसम्बन्धी सामाग्री बनाउने क्रिएटरका लागि सामाग्री निर्माणसँगै अतिरिक्त आम्दानीको बाटो खोल्ने अपेक्षा गरिएको छ ।