मेक्सिकोका ‘लेजेन्ड’ गोलकिपर ओचोआले रचे नयाँ कीर्तिमान

काठमाडाैं । मेक्सिकोले चेक गणतन्त्र (चेकिया)लाई ३-० ले पराजित गर्दै विश्वकपको समूह चरणमा शतप्रतिशत जितको यात्रा पूरा गरेको खेलमा एउटा सुनौलो इतिहास रचिएको छ। खेलको ७८औँ मिनेटमा ४० वर्षीय दिग्गज गोलकिपर गुइलेर्मो ओचोआ मैदान प्रवेश गर्दा ऐतिहासिक एस्टेका रङ्गशालामा उपस्थित हजारौँ समर्थकहरूले तालीको गडगडाहट र गगनभेदी हुटिङका साथ उनको स्वागत गरे।

यस अघिका खेलहरूमा युवा गोलकिपर राउल ‘ताला’ रान्जेलको ब्याक-अपका रूपमा बेन्चमा रहेका ओचोआका लागि बुधबार रातिको खेल भावनात्मक र ऐतिहासिक पुनरागमन बन्यो। यो मैदान त्यही ठाउँ हो जहाँबाट उनले क्लब र देशका लागि आफ्नो पहिचान बनाएका थिए। खेलमा मेक्सिकोको तेस्रो गोलका लागि ओचोआले नै लामो पास उपलब्ध गराएर मुभको सुरुवात गरेका थिए, जसमा अल्भारो फिडाल्गोले सानदार गोल गरे।