उपराष्ट्रपतिसँग अमेरिकी कार्यवाहक राजदूतको भेट

काठमाडौँ। उपराष्ट्रपति रामसहायप्रसाद यादवसँग नेपालस्थित अमेरिकी दूतावासका कार्यवाहक राजदूत स्कट अर्बमले शिष्टाचार भेट गरेका छन्।

लैनचौरस्थित उपराष्ट्रपतिको कार्यालयमा बिहीबार भएको भेटमा नेपाल र अमेरिकाबीचको द्विपक्षीय सम्बन्धका विविध आयामबारे छलफल भएको थियो। उपराष्ट्रपति यादवले सन् १९४७ मा कूटनीतिक सम्बन्ध स्थापना भएदेखि नै पारस्परिक सम्मान, आपसी समझदारी, विकास सहयोग तथा गहिरो जनस्तरीय सम्बन्धका आधारमा नेपाल-अमेरिकाबीचको सम्बन्ध घनिष्ठ, सौहार्दपूर्ण र सहयोगात्मक रहँदै आएको बताए।