जापानको उत्तरी तटीय क्षेत्रमा ७.२ म्याग्निच्युडको शक्तिशाली भूकम्प

टोकियो । जापानको उत्तरी तटीय क्षेत्रमा बिहीबार बिहान मानिसहरूको आवतजावत बढी हुने व्यस्त समयमा एक शक्तिशाली भूकम्प गएको छ। जापानको मौसम विज्ञान एजेन्सीका अनुसार भूकम्प शक्तिशाली भए पनि यसबाट सुनामी आउने कुनै खतरा भने छैन।

इवाते प्रान्तको पूर्वी तटीय क्षेत्रलाई केन्द्रविन्दु बनाएर गएको उक्त भूकम्पको तीव्रता सुरुमा ६.९ म्याग्निच्युड मापन गरिए पनि पछि परिमार्जन गर्दै ७.२ म्याग्निच्युड रहेको जनाइएको छ। यो भूकम्प जमिनको सतहबाट करिब ५० किलोमिटर (३० माइल) गहिराइमा गएको थियो। अमेरिकी भूगर्भ सर्वेक्षण (युएसजिएस) ले पनि सो भूकम्प रेकर्ड गर्दै यसको तीव्रता ६.९ म्याग्निच्युड रहेको उल्लेख गरेको छ।