आयोगमा १२ हजार जनाले बुझाए सम्पत्ति विवरण, सर्वोच्चको आदेशले काम ठप्प

काठमाडौँ । सम्पत्ति छानबिन आयोगमा १२ हजार जनाले सम्पत्ति विवरण बुझाए पनि आयोगको काम दुई दिनदेखि ठप्प भएको छ । सर्वोच्च अदालतका न्यायाधीश नृपध्वज निरौलाको एकल इजलासले बुधबार अन्तरिम आदेश जारी गरेपछि आयोगका सबै कामकारबाही रोकिएका हुन् ।

सम्पत्ति छानबिन आयोगका अध्यक्ष राजेन्द्रकुमार भण्डारीका अनुसार अदालतको आदेशपछि सबै काम यथास्थितिमा राखिएको छ । असार ३२ सम्मको समयसीमा दिएर आयोगले सम्पत्ति विवरण सङ्कलन गर्ने र उजुरी लिने काम गर्दै आएको थियो । अध्यक्ष भण्डारीले भने, ‘अदालतको आदेशपछि अब कुनै पनि काम अघि बढ्दैन । हालसम्म १२ हजारले सम्पत्ति विवरण बुझाउँदा २ हजार जनाले उजुरी दिएका छन् ।’