चीनले सफलतापूर्वक सम्पन्न गर्‍यो पृथ्वी–चन्द्रमा दुईतर्फी लेजर सञ्चार परीक्षण

बेइजिङ । चिनियाँ अनुसन्धानकर्ताहरूले पृथ्वी र चन्द्रमाबिच दुईतर्फी उच्चगतिको लेजर सञ्चार लिंक परीक्षण सफलतापूर्वक सम्पन्न गरेका छन् । यससँगै चीनको अन्तरिक्ष लेजर सञ्चार प्रविधि पृथ्वीको नजिकको कक्षबाट गहिरो अन्तरिक्षसम्म विस्तार भएको छ ।

चिनियाँ एकेडेमी अफ साइन्सेसअन्तर्गत टेक्नोलोजी एन्ड इन्जिनियरिङ सेन्टर फर स्पेस युटिलाइजेसन (सीएसयू) का अनुसार एक वर्षभन्दा बढी समयसम्म कक्षमा गरिएको परीक्षणका क्रममा अनुसन्धानकर्ताले ४ लाख किलोमिटरभन्दा बढी दूरीमा पृथ्वी र चन्द्रमाबिच दुईतर्फी लेजर सञ्चार सम्पर्क स्थापना गरेका हुन् । परीक्षणका क्रममा अपलिंकमा १.२५ मेगाबिट प्रतिसेकेन्ड (एमबीपीएस) र डाउनलिंकमा १०० एमबीपीएस सम्मको सञ्चार गति हासिल भएको छ ।