बाढी र डोजरले लखेटिएका सुकुमबासीहरूको कहिल्यै नसकिने सास्ती

काठमाडौँ । थापाथलीस्थित बागमती किनारको सुकुमबासी बस्तीमा डोजर चलेपछि सुकुमबासीहरूलाई आपतकालीन अवस्थामा कीर्तिपुरको होल्डिङ सेन्टरमा राखियो । उनीहरूलाई त्यहाँ पनि सुख मिलेन । असार १९ मा होल्डिङ सेन्टर छाडेर जाने सूचना जारी भएपछि उनीहरूमा डर, अन्योल र छट्पटी थियो । त्यसमाथि बस्तीमा बाढी पसेपछि अर्को विपत आइलाग्यो ।

असार २७ गते भीषण वर्षा र बाढीले कीर्तिपुरको राधास्वामी होल्डिङ सेन्टर डुबायो । यहाँ आश्रय लिइरहेका सुकुमबासीले लुगाफाटो, बिछ्यौना र अन्य सामान जोगाउन सकेनन् । सुकुमबासी बस्तीमा डोजर चल्दा मुस्किलले जोगाएका सामानहरू बाढीले डुबाइदियो । ज्यान जोगाउन लुगाफाटो समेत छोडेर भागेका २३ सुकुमबासी परिवार यतिबेला भक्तपुरको बोडेस्थित कृषि विकास तालिम केन्द्रमा ओत लागिरहेका छन् ।