मालिकामा महिला स्वास्थ्यसम्बन्धी विशेषज्ञ शिविर

पश्चिम गुल्मीको मालिका गाउँपालिकाले महिला स्वास्थ्य सम्बन्धी विशेषज्ञ शिविर सञ्चालन गर्ने भएको छ। यस गाउँपालिकाले वडा नम्बर ४ स्थित अर्खावाङ्ग स्वास्थ्य चौकीमा दुई दिनसम्म महिला स्वास्थ्यसम्बन्धी निःशुल्क बृहत् विशेषज्ञ स्वास्थ्य शिविर सञ्चालन गर्ने भएको हो।

ग्रामीण भेगका महिलाहरूको स्वास्थ्यलाई मध्यनजर गर्दै यहि जेठ २३ र २४ गते बिहान ९ देखि साँझ ५ बजेसम्म विशेषज्ञसहितको स्वास्थ्य सेवा उपलब्ध गराउन लागिएको गाउँपालिकाले जनाएको छ। गाउँपालिकाका प्रमुख प्रशासकीय अधिकृत विवेक खनालका अनुसार महिलाहरूमा देखिने विभिन्न स्वास्थ्य समस्याहरूको निःशुल्क परीक्षण तथा उपचार गरिनेछ। शिविरमा वरिष्ठ स्त्री तथा प्रसूति रोग विशेषज्ञहरूद्वारा महिलाहरूको समग्र स्वास्थ्य परीक्षण गरिने बताइएको छ।