वनलाई उद्योग र अर्थतन्त्रसँग जोड्न माग

काठमाडौँ । सिंहदरबारमा शुक्रबार बसेको संघीय संसदको कृषि, सहकारी तथा प्राकृतिक स्रोत समितिको बैठकमा सांसदहरूले नेपालको वन नीतिलाई केवल संरक्षणमा मात्र सीमित नराखी उत्पादन र राष्ट्रिय अर्थतन्त्रसँग प्रत्यक्ष जोड्नुपर्नेमा जोड दिएका छन् ।

वन तथा वातावरण मन्त्रालयको प्रगति समीक्षा र आगामी कार्ययोजनामाथि छलफल गर्दै सांसदहरूले वन पैदावारमा आधारित उद्योगको विकास र वैज्ञानिक व्यवस्थापनको आवश्यकता औँल्याएका हुन् । बैठकमा मानव–वन्यजन्तु द्वन्द्व न्यूनीकरण, जलवायु अनुकूलन, चुरे संरक्षण र रैथाने बालीको प्रवर्द्धनका लागि सरकारले स्पष्ट नीति ल्याउनुपर्ने माग गरियो ।